الاحد 16/3 روحت المنشيه كنت داخل لنقيب المحاميين علشان اقدم ورقى الخاص بالقيد بدرجة الاستئناف دفعت الرسوم ورايح اسلم الورق لاقيت مين واقف ادام النقيب لو تفتكروا اسمه الشيخ رزق اللى كنت بترافع عنه وامن الدوله قبضت عليه وضربوه لما طلبت تنفيذ حكمه الخاص ضد وزير الداخليه ومدير امن الدوله باسكندريه بتعويضه بمبلغ 50 الف جنيه عن الفتره اللى قضاها بالمعتقل , انا زى ماسبق وقلت لما الداخليه رفضت تنفذ الحكم انا ماسكتش زى الباقيين اللى ليهم احكام ضد الداخليه ومش عايزين ينفذوها لا قلت حارفع جنحه مباشره على وزير الداخليه ومدير امن الدوله لاقيت وزير الداخليه عنده حصانه لانه عضو مجلس شورى فقدمت طلب لرفع الحصانه عن وزير الداخليه علشان ارفع عليه جنحه مباشره لعدم تنفيذ حكم قضائى , طبعا هما طلبوا من موكلى انه يلغى التوكيل وهو لغاه فى يوم 10/3 وانا ماكنتش موجود وماعرفش غير يوم 16 انه لغاه لما شفته بالنقابه , بس برضه الغاء التوكيل صحيح حايعملى مشاكل وانا بسعى لتنفيذ الحكم لكن انا اعرف اشتغل برضه من غير توكيل , امن الدوله لاقونى مستمر فى تنفيذ الحكم رغم الغاء التوكيل وومفيش حاجه تضرنى جابوا الراجل وضغطوا عليه علشان ياخد الصيغه التنفيذيه منى علشان مايكنش معايا احكام اطالب بتنفيذها , وطلبوا منه يقدم ضدى شكوى فى نقابه المحاميين والغريب التهمه اللى وجهها المحامى اللى راح النقابه مع الشيخ رزق هى التشهير بوزير الداخليه ومدير امن الدوله باسكندريه , المحامى ده شكله منتمى للجماعات الاسلاميه مربى دقنه بس زى ماقالى الشيخ رزق هو مايعرفهوش هما امن الدوله قالوله روح مع المحامى ده واعمل اللى حايقلك عليه , انا سمعت التهمه كنت حاموت من الضحك انا اللى حاشهر بوزير الداخليه ومين اللى بيتهمنى الراجل اللى انا اتبهدلت فى دفاعى عنه واللى واخد حكم ضد الداخليه علشان عذبوه لمده 9 سنوات بالمعتقل ولما اخد الحكم ضربوه علشان ماينفذش الحكم , الراجل تحول بقدرة قادر الى مدافع عن وزير الداخليه وامن الدوله اللى ذاق الويل على ايديهم , وكمان المحامى اللى مربيلى دقنه بيدافع عن امن الدوله بحرقه وكل شويه يردد شهرت بوزير الداخليه وامن الدوله اقله شهرت بيهم فى ايه هو انا قلت حاجه ماحصلتش مش هما فعلا يا سيدى رافضين ينفذوا الحكم يقولى طيب بس تشهر بيهم , فضل يردد الجمله دى لحد مادوشنا بيها , طبعا نقيب المحاميين قالى جبله الصيغه التنفيذه اديهاله وهو اتعابك حايديهالك بعد تنفيذ الحكم , وبصراحه حقه يستلم الصيغه التنفيذيه وفقا لقانون المحاماه لان مفيش عقد بينى وبينه وانما عقد شفوى , وانا عموما قررت اسلمه الصيغه التنفيذيه رغم انى عارف انه حايسلمها لامن الدوله ولو اخدوها منه مش حايشوفها تانى , بس اعمل ايه الراجل غلبان ومش حمل بهدله فى امن الدوله زيى , انا لو عليا يحبسونى 20 سنه ويعذبونى ويموتونى بس اخد حقى ومش حاتنازل عنه لكن الراجل ذنبه ايه , امن الدوله انتهكوا كل حقوق المواطنين .
لك الله يا شعب مصر
هناك 16 تعليقًا:
ياصباح الخير بس باليل بقه واخد بالك انت
بص بقه بس بص كويس
انا مليش في السياسه دي اصل انا مش بحب الحلاوة
بس هاقولك حاجه احلي حاجه انك متسكوتش عن حقك دي عجبتني فيك
ربنا ينصرك عليهم
نورت مدونتي بجد وانا بيتهقالي كدا
نورت مدونتك بردك ولا ايه
سلاموووووووووز
وزة
تحياتى
وزير الداخلية مش محتاج تشهير اعماله كفايا اوي هي كفيلة انها تشهر به
شكرا يا انين الحزن ولو انى مش بحب الحزن لانى دايما عندى امل كبير فى بكره
صدقينى انا يوم ما اسكت عن حقى اعرفى انى ميت
لانى لن اكون شيطان اخرس ( الساكت عن الحق شيطان اخرس )
اللهم ارفع غضبك ومقتك عنا
حاجة توجع بجد بس احسن حاجة انك مش هتسيب حقك
تقبل مرورى
يا شادى وزير الداخليه اشهر من نار على علم
مصر كلها تشهدله ان مفيش وزير داخليه مسك زيه ولا حتى ايام الاحتلالشكرا يا جنا
على فكره يا جماعه انا كنت عامل مدونه تانيه ماكنتش بكتب فيها غير السياسه قلت ابعد عن السياسه شويه مش حايبقى كل حاجه سياسه
عملت دى علشان اكتب احداث من ايامى برضه لاقتها قلبت سياسه
تاكدى يا موناليزا انى مش حاسيب حقى اقسم بالله يوم ما اسيب حقى وانام وانا مقرر انى خلاص اتنازل يبقى الموت اهون
بجد مش حاسيب حقى مش علشانى بس لأ علشان تشجيعكم كلكم هو اللى بيخلينى استمر
""" اللهم ارفع غضبك ومقتك عنا"""
لازم كل انسان يطلب حقه ويدافع عنه
دا انت طلعت مواطن جامدومحامى همام ,,بس هو فيه تار بايت بينك وبين اللى بدقون ,,بص يا مواطن ,,الوحش والكويس فى كل الأحزاب والجماعات يعنى حتلاقى برضه فى حزب الغد ناس مندسين عشان يبوظوا صورتكم مش كل اللى بدقن وحش ولا كل اللى من غير دقن شريف نصيحة متحكمش على المظهر وان كانت الدقن دى سنة عن خير البشر ودليل على الالتزام بمنهجه ومطلقها يستحق الاحترام لأنه مبيخفش وضد التيار العلمانى اللى الناس ماشية معاه وبرضه لكل قاعدة شواذ,بس برافو عليك خليت اللى موكلك فى القضية يقول جحيم الحكومة ولا جنة مواطن مصرى انت عملت فى الراجل ايه ههههههه أكيد طلعت عليه شخصية المخبر ,تحياتى أخى الكريم
شكرا يا رشا على تعليقك اللى لو كلامك تم مصر كلها حاتتصلح والحكومه ومبارك مش حايقدروا يستمروا اكتر من كده
هو ده اللى بقوله يا مجداويه
ان الناس ماتنخدعش بالشخص لانه مربى دقنه مش كل اللى مربين دقنهم بيتقوا الله منهم نصابين بيتخذوا تربية الذقن وسيله للنصب على الناس ومنهم طبعا ناس محترمه فالموضوع مش بالذقن ولا الملابس
لازم الاول نختبر الانسان قبل التعاملا معاه والوثوق فيه
وبعدين انا ماعنلت اى حاجه فى موكلى ده بالعكس الراجل بيعمل كل ده وهو مكسوف منى وبيقلى معلش غصب عنى
والله يا اخي انا مش عارف اعلق والله تعجز الكلمات عن وصف حالنا
لك الله يا مصر
انتمني ان تواصل دائما
http://a-agouz.blogspot.com/
أشكرك أخى مواطن مصرى ومحامى ومخبر أحيانا على اضافة مدونتى عندك ,وشرف كبير ليا من مواطن شريف ومبيخافش غير من اللى خلقه ,,ربنا معاك وانصر الله ينصرك
انتى اللى مخبر يا مجداويه علشان شوفتى الحمار بيضرب ومابلغتيش عن الجريمه
شكرا احمد باا على تعليقك وتشريفك مدونتى
إرسال تعليق