شاركونا 6 ابريل امام محكمه الحقانيه بالمنشيه
إتفقت كافه القوي الوطنية في مصر علي أن يكون يوم 6 إبريل يوم إضراب عام في مصر يوم 6 إبريل . شاركنا فى الميادين العامة ماتروحشي الشغل ماتروحشي الجامعه ماتروحشي المدرسة ماتفتحشي المحل ماتفتحشي الصيدليه ماتروحشي القسم
عايزين مرتبات تعيشنا عايزين نشتغل عايزين تعليم لأولدنا عايزين مواصلات أدمية عايزين مستشفيات تعالجنا عايزين دواء لأطفالنا عايزين قضاء منصف عايزين أمن وأمان عايزين حرية وكرامه عايزين شقق للعرسان
مش عايزين رفع أسعار مش عايزين محسوبيه مش عايزين ظباط بلطجية مش عايزين تعذيب في الإقسام مش عايزين أتاوات مش عايزين فساد مش عايزين رشاوي مش عايزين إعتقالات مش عايزين تلفيق قضايا
قول لأصاحبك مايروحوش الشغل همه كمان وخليهم يدخلوا الإضراب
6أبريـــــــــــل.. اضراب عام في مصر سلمي أبعت رسايل لخمسة من أصحابك ولو كل واحد بعت لخمسة في ظرف يومين البلد كلهاحتعرف بالموبايل بالأرضي بالأيميل ابعت حتي رسايل عالشات في قنوات التليفزيون أنسخوا رسالتنا وأبعتوها تعليق على كل المقالات ألي بتقروها
بيكوا وبينا البلد دي حتتغير ان شاءالله
معادنا 6 ابريل امام محكمه الحقانيه بالمنشيه للتظاهر ضد الغلاء
هناك 16 تعليقًا:
أعتقد ان اغلب المصريين لن يعتصموا واللي بيتظاهروا كل مرة هما هما اللي حيتظاهروا وعموما اتمني يحصل جديد
أنا افتكرت حاجة من أيام السادات
قامت مظاهرة قام بيها طلبة الجامعة بيطلبوا مطالب من الحكومة المطالب دي كلها اتنفذت ؟
و بالمناسبة دي غنى عبد الحليم اطلب يا شباب
لكن تفتكر إن الناس اللي محتاجة كل مليم بتقبضه علشان تأكل عيالها و تصرف على بيوتها ممكن يضحوا بيوم يتخصم من مرتبهم و يا عالم يمكن الحكومة ترفدهم أصلا بعد المظاهرة دي
اللي أنا باقصده إنك متقدرش تروح لواحد عنده هو و أسرته فرخة هي كل اللي عندهم كل يوم بتبيض بيضة بيقسموها مع بعض تقوله متكولش النهاردة أنت و ولادك البيضة علشان خاطر الحكومة مسؤولة تجيب لكم أكتر من فرخة و لحوم و حمام و ما لذ و طاب
ممكن جدا الحكومة تدبح لهم الفرخة و ما يبقوش طالوا حتى البيضة اللي بياكلوها
يا شادى باشا المره دى حاتشوف ناس جديده بس تعالى انت وجرب ومش تيجى لوحدك انت عليك مسئوليه انك تجيب زمايلك وصحابك وجيرانك واهلك كلهم معاك
تعالى وادعوا ليها علشان تكون مختلفه
يا عاشق باشا هو انت تعتقد ان الاسره المصريه لسه عندها فرخه
كان فى مثل شعبى بيول ماحدش بيبات من غير عشا
ناااااس كتير اوى دلوقتى لا بتتعشى ولا تتغدى ولا تفطر وبتموت من الجوع
يبقى اللى مش لاقى ياكل عياله يطالب بحقه ويمتنع عن العمل لصالح الدوله اللى فلوسها منهوبه ويطالب باصلاح الدوله ولا لا
اللى مش لاقى يشترى الاكل مايقدرش يمتنع عن الشراء حتى يزول الاستغلال والجشع وتعود الاسعار كما كانت
اللى مش لاقى ياكل ده وقاعد فى بيته خايف يثور ومستنى واحد تانى يجبله الاكل ويتضرب ويتحبس علشانه
ده مش بس يستاهل يجوع ده يستاهل يدفن نفسه احسن
وبعدين يا عاشق باشا ماهو لو الناس اضربت عن العمل لحين اصلاح الامور الدوله حاتفصل مين ولا مين حاتفصل شعب مصر كله
يا عاشق العندليب الاضراب والتظاهر من افضل الطرق الاحتجاجيه السلميه من اجل الحصول على الحق
لا نريد ان ننتظر الى ان يخرج الشعب بالشارع يعتدون على بعضهم البعض من اجل لقمة العيش
لازم حل سلمى والا البلد خلال سنتين حاتضيع
يا مواطن باشا
أنت قلتها بنفسك حتى الفرخة بقت مش لاقينها
لكن زي ما بنقول المسألة مش مسألة خوف بس لكن زي ما قال الأخ الفاضل اللي حيروحوا يتظاهروا مش الشعب المصري كله ده يا راجل الواحد ما بيصدق يلاقي وظيفة يجي سايبها
أنت لما اتكلمت اتكلمت من وجهة نظرك أنت مش من وجهة نظر المواطن اللي محتاج كل مليم بيقبضه ده دلوقت الراجل اللي عنده أبناء بيصرف عليهم بعد ما اتخرجوا أكتر مما كان بيصرف عليهم و هما بيتعلموا ؟
عاشق باشا انت بتتكلم من غير ماتقول حلول
انا بقلك الحل فى الاضراب والتظاهر من اجل لقمة العيش من اجل الضغط على الحكومه لتلبية مطالبنا كل ماكان الععد كبير كل ما استجابت الحكومه
دى وجهة نظرى
انت بقى قولى ايه الحل وقولى وجهة تظرك مش بس تقولى لا ده ماينفعش
لالالالالالالالالا لازم تقولى ايه اللى ينفع يمكن نعمله
مواطن باشا
أنا مش معترض على أسلوب التظاهر بشكل عام زي ما أنت فاكر و الدليل على كده أني ضربت لك مثل باللي حصل أيام السادات و مطالب المظاهرة اتنفذت فعلا
أنا قصدي إننا ندور على حل تاني يمشي مع حال بلدنا
يعني مثلا انت مش حتروح لواحد مسيحي شايف إن الإسلام دين مش حقيقي و تقولوا تعال صلي معايا ركعتين في المسجد و أنت حتعرف قد أيه الدين ده حقيقي
لازم نشوف حل يتناسب مع الإنسان اللي موجه ليه الكلام
بلدنا الأسلوب ده حاليا مينفعش معاها و ده إثباتاته واضحة من فترة كبيرة بدليل إن من فترة كبيرة جدا و لا مظاهرة مطالبها اتنفذت
أنا باعترف أني مش قادر أوصل لحل لن كل الطرق جربناها و منفعتش بس حاقولك أيه جربوا و شوفوا أيه اللي حيحصل روحوا اتظاهروا و لو نفع الموضوع حابقى أسمعك اطلب يا شباب إن شاء الله !
ايه المثال ده ايه علاقته بالموضوع اصلا
بلاش امثله ونتكلم صح
الناس خايفة علي كل حاجةو من اي حاجة عشان كده ناس كتير مش حتروح الحقانية اعذرهم
اكيد مش كل مصر حاتروح يا ام احمد
بس اتاكدى ناس كتير حاتروح
هشارك حتى ولو حصل ايه
عاشق العندليب:
الرؤيا سودة ومش محتاجة انك توضحها
بس هقولك كلمة واحدة بس
(إن الله لايغير مابقوم حتى يغيرواما بانفسهم)
فيه ايه اكتر من ان الناس مش لاقيين اللقمة يكلوها
انت شايف ان فيه حلول تانية؟ وانا متأكده ان مفيش
يبقه نقعد ونربع ايدينا ونفضل نتكلم ونتكلم ومفيش فعل بلاش الروح الانهزامية دى الله يخليك
انا سمعت انهم قبضوا عليك فى الاعتصام يانصار تخرج بالسلامة ان شاء الله انت وكل زمايلك
ياجماعة نصار اتحبس 15 يوم على ذمة التحقيقات واترحل على قسم الحضرة
بلد ديموقراطى...ديموقراطى صحيح
السلام عليكم
أخى الكريم هو انت أحمد العراقى نصار ؟؟؟؟؟؟؟؟؟؟؟؟؟؟؟؟؟
اللى كان مقبوض عليه؟؟
مش ممممممممممكن تكون انت بس باين انه انت
يا نهااااااااااااار وأنا بأقول حضرتك مش ظاهر ليه .زأكيد موضوع وزير الداخلية ده كان له أثر فى القبض عليك
بس لو هو انت فأنا عاجبنى ردك جدا على عمرو أديب
ربنا معاك ودعائى لك بكل خير واوعى تغير مبادءك لأنك عارف انك صح
ابقى طمنى عليك وعرفنى هو انت ولا لأ وووان كان انت فسلامى الحار للوالدة وربنا ما يحرمكم من بعض ,ووالله أنا زاد احترامى لك أضعاف أضعاف وربنا يحميك ,,ان الله يدافع عن الذين آمنوا
تحياتى وتقديرى
إرسال تعليق