شاركونا 6 ابريل امام محكمه الحقانيه بالمنشيه

شاركونا 6 ابريل امام محكمه الحقانيه بالمنشيه

إتفقت كافه القوي الوطنية في مصر علي أن يكون يوم 6 إبريل يوم إضراب عام في مصر يوم 6 إبريل . شاركنا فى الميادين العامة ماتروحشي الشغل ماتروحشي الجامعه ماتروحشي المدرسة ماتفتحشي المحل ماتفتحشي الصيدليه ماتروحشي القسم

عايزين مرتبات تعيشنا عايزين نشتغل عايزين تعليم لأولدنا عايزين مواصلات أدمية عايزين مستشفيات تعالجنا عايزين دواء لأطفالنا عايزين قضاء منصف عايزين أمن وأمان عايزين حرية وكرامه عايزين شقق للعرسان

مش عايزين رفع أسعار مش عايزين محسوبيه مش عايزين ظباط بلطجية مش عايزين تعذيب في الإقسام مش عايزين أتاوات مش عايزين فساد مش عايزين رشاوي مش عايزين إعتقالات مش عايزين تلفيق قضايا

قول لأصاحبك مايروحوش الشغل همه كمان وخليهم يدخلوا الإضراب

6أبريـــــــــــل.. اضراب عام في مصر سلمي أبعت رسايل لخمسة من أصحابك ولو كل واحد بعت لخمسة في ظرف يومين البلد كلهاحتعرف بالموبايل بالأرضي بالأيميل ابعت حتي رسايل عالشات في قنوات التليفزيون أنسخوا رسالتنا وأبعتوها تعليق على كل المقالات ألي بتقروها

بيكوا وبينا البلد دي حتتغير ان شاءالله

معادنا 6 ابريل امام محكمه الحقانيه بالمنشيه للتظاهر ضد الغلاء

اتهمونى بالتشهير بوزير الداخليه ومدير امن الدوله

الاحد 16/3 روحت المنشيه كنت داخل لنقيب المحاميين علشان اقدم ورقى الخاص بالقيد بدرجة الاستئناف دفعت الرسوم ورايح اسلم الورق لاقيت مين واقف ادام النقيب لو تفتكروا اسمه الشيخ رزق اللى كنت بترافع عنه وامن الدوله قبضت عليه وضربوه لما طلبت تنفيذ حكمه الخاص ضد وزير الداخليه ومدير امن الدوله باسكندريه بتعويضه بمبلغ 50 الف جنيه عن الفتره اللى قضاها بالمعتقل , انا زى ماسبق وقلت لما الداخليه رفضت تنفذ الحكم انا ماسكتش زى الباقيين اللى ليهم احكام ضد الداخليه ومش عايزين ينفذوها لا قلت حارفع جنحه مباشره على وزير الداخليه ومدير امن الدوله لاقيت وزير الداخليه عنده حصانه لانه عضو مجلس شورى فقدمت طلب لرفع الحصانه عن وزير الداخليه علشان ارفع عليه جنحه مباشره لعدم تنفيذ حكم قضائى , طبعا هما طلبوا من موكلى انه يلغى التوكيل وهو لغاه فى يوم 10/3 وانا ماكنتش موجود وماعرفش غير يوم 16 انه لغاه لما شفته بالنقابه , بس برضه الغاء التوكيل صحيح حايعملى مشاكل وانا بسعى لتنفيذ الحكم لكن انا اعرف اشتغل برضه من غير توكيل , امن الدوله لاقونى مستمر فى تنفيذ الحكم رغم الغاء التوكيل وومفيش حاجه تضرنى جابوا الراجل وضغطوا عليه علشان ياخد الصيغه التنفيذيه منى علشان مايكنش معايا احكام اطالب بتنفيذها , وطلبوا منه يقدم ضدى شكوى فى نقابه المحاميين والغريب التهمه اللى وجهها المحامى اللى راح النقابه مع الشيخ رزق هى التشهير بوزير الداخليه ومدير امن الدوله باسكندريه , المحامى ده شكله منتمى للجماعات الاسلاميه مربى دقنه بس زى ماقالى الشيخ رزق هو مايعرفهوش هما امن الدوله قالوله روح مع المحامى ده واعمل اللى حايقلك عليه , انا سمعت التهمه كنت حاموت من الضحك انا اللى حاشهر بوزير الداخليه ومين اللى بيتهمنى الراجل اللى انا اتبهدلت فى دفاعى عنه واللى واخد حكم ضد الداخليه علشان عذبوه لمده 9 سنوات بالمعتقل ولما اخد الحكم ضربوه علشان ماينفذش الحكم , الراجل تحول بقدرة قادر الى مدافع عن وزير الداخليه وامن الدوله اللى ذاق الويل على ايديهم , وكمان المحامى اللى مربيلى دقنه بيدافع عن امن الدوله بحرقه وكل شويه يردد شهرت بوزير الداخليه وامن الدوله اقله شهرت بيهم فى ايه هو انا قلت حاجه ماحصلتش مش هما فعلا يا سيدى رافضين ينفذوا الحكم يقولى طيب بس تشهر بيهم , فضل يردد الجمله دى لحد مادوشنا بيها , طبعا نقيب المحاميين قالى جبله الصيغه التنفيذه اديهاله وهو اتعابك حايديهالك بعد تنفيذ الحكم , وبصراحه حقه يستلم الصيغه التنفيذيه وفقا لقانون المحاماه لان مفيش عقد بينى وبينه وانما عقد شفوى , وانا عموما قررت اسلمه الصيغه التنفيذيه رغم انى عارف انه حايسلمها لامن الدوله ولو اخدوها منه مش حايشوفها تانى , بس اعمل ايه الراجل غلبان ومش حمل بهدله فى امن الدوله زيى , انا لو عليا يحبسونى 20 سنه ويعذبونى ويموتونى بس اخد حقى ومش حاتنازل عنه لكن الراجل ذنبه ايه , امن الدوله انتهكوا كل حقوق المواطنين .

لك الله يا شعب مصر

يوم الانتخابات والفوز فى ظل خيانة احزاب المعارضه

الانتخابات دى بقى حكايه تانيه خالص احنا كنا 12 حزب شاركوا بمنتدى شباب الاحزاب الدكتوره نورهان اول يوم اقترحت عمل انتخابات محاكاه لانتخابات المحليات اترشح ليها 16 من الاحزاب المشاركه وكان فى اكتر من مرشح من نفس الحزب اليوم التالت وهو يوم الانتخابات بعد عمل التحالفات بين احزاب المعارضه اتفقنا ان احزاب المعارضه تنزل بمرشح واحد بس لعمل تكافؤ بين المعارضه والوطنى اللى كان مشترك فى المنتدى ب 14 عضو وكان فى 4 مرشحين لاحزاب المعارضه نازلين من التجمع وخليفه من الشباب واحمد من الشعب وانا من الغد بعد ما اتفقت انا وجهاد انه يتنازلى وهو مش بس اتنازل لا كمان عملى دعايه جامده وهو ده كان المطلوب سواء انا اتنازلتله او هو اتنازلى كنا لازم حانكون فريق عمل واحد , لحد اليوم الاخير كان احمد من حزب الشعب موافق انه يتنازل بس كان متردد المهم انه اعلن تنازله لينا واتبقى خليفه وانا وبنت من التجمع رفضت تتنازل رغم ان امكانيتها قليله جدا وكان حاضر من التجمع 4 اعضاء 3 من القاهره وواحد من اسكندريه واعلن انه حايبطل صوته والتلاته التانيين صوتهم خلاص معروف لصاحبتهم من نفس الحزب , كده مافضلش غيرى انا وخليفه من الشباب بالنسبه للشغل اللى الغد عمله كنا احنا الغد ضامنين عدد اصوات اكتر من اللى مع خليفه وكنا كمان عاملين دعايه وشغل اكتر ده غير مشاركتنا فى الندوات ودفاعنا عن احزاب المعارضه وعن الشباب والهجوم القوى والمرتب على الفساد , وكمان عضوين من الوطنى مش حاقول اسمهم كلمونى وقالولى انهم حايدونى صوتهم انا بصراحه طبعا ماصدقتش وقلت دول بيخدعونى , زمايلنا فى الحزب الناصرى اكدولى انهم عطونى صوتهم ومش بس عطونى صوتهم كمان كانوا بيعملولى دعايه عند احزاب المعارضه , وكانوا مضايقين جدا من زمايلهم بالوطنى لانهم اليوم الاول نزلوا 6 وصلت الاوامر لاربعه ينسحبوا وده زى مابقول امر وعافيه , وحتى بعد انسحابهم قرروا انهم حايدوا صوتهم لمصطفى وبس وسالى حاتنزل تمويه وتانى يوم غيروا رايهم وحايدوا صوتهم لسالى ورغم كده بيضحكوا على مصطفى وبيقلوله صوتهم معاه , لكن هو اختارنى انا لانه زى ماقالى الغد عنده مبادىء واعضاءه عندهم جرأه عمره ماشافها قبل كده والمنظمين للدوره اختارونى انا وجهاد وطبعا محمود من افضل الناس بالدوره دى وان من غيرنا كانت حاتكون دوره ممله وكلها كلام مكرر
المهم بدأ التصويت كان رئيس اللجنه المشرفه هيثم من الغد وبنت تانيه من الوطنى كانت مساعده ليه وماكنش ليهم حق التصويت .
بدأ التصويت وكان بالنداء على الاسماء وكنا بنتوجه للصندوق للتصويت وبنمضى فى كشف لمنع تكرار التصويت , المهم التصويت انتهى وبدأنا الفرز , وبدأ الفرز هيثم سحب اول ورقه ونادى على الاسم اللى تم اختياره من بين المرشحين , وكان اول اسم سالى والتانى كمان سالى وتالت ورقه احمد واستمر الفرز وتقدمت سالى حتى الان بخمس اصوات لصوت واحد ليا ثم اقتربت منها وابحت هى 7 اصوات وانا 6 ثم فجأه بدأت سالى تتفوق الى ان وصلت 16 صوت وانا 8 اصوات ومصطفى 5 وهاله من التجمع 3 اصوات وفى صوتين باطلين طبعا خلاص النتيجه كانت شبه محسومه فوز سالى رشدى , طبعا كلنا اتصدمنا من النتيجه لحد دلوقتى معنى كده ان الحزب الوطنى لحد دلوقتى حصل على 21 صوت وعدد اعضاء الحزب الوطنى بس 14 منهم واحده فى اللجنه المشرفه واتنين عطوا الغد يعنى 11 وطنى العشره الزياده دول منين ازاى عضو بحزب معارض يدى صوته للوطنى وهو عمال يقول ان سبب مشاكل مصر هما الحزب الوطنى , انا بصيت على هانى من الناصرى هههههههههه حسيت انه بجد حايتجنن ومش مصدق اللى بيحصل وجهاد لاقيته بيبص ومش عارف يعمل ايه فى النتيجه الزفت دى وتامر كمان مستغرب جدا ومنيره قاعده جمبى بتقول لسه الاصوات يا رب وحسن من الاتحادى الديمقراطى واقف مش مصدق ان احزاب المعارضه خانوا بعض والمصيبه اللى خان مش القيادات دول الشباب اللى طول الندوه بيقول الوطنى يساوى الفساد وفى النهايه عطوا صوتهم للفساد وسميه ورحاب من الخضر قاعدين مش عارفين يقولوا ايه , هيثم مد ايده ومسك ورقه تانيه وانا خلاص بقول حاينادى سالى رشدى ولكنه خيب ظنى واخيرا قال احمد العراقى ثم احمد العراقى واللى بعديها سالى قلت رجعنا تانى لنفس النغمه بس كان هيثم اسرع من تفكيرى ونادى احمد العراقى ثم احمد ثم احمد ثم ورقه باطله ثم احمد واحمد واللى بعديها برضه احمد بصراحه الامل رجعلنا كلنا من تانى وبدأنا نفوق مره كمان والورقه اللى بعديها باطله برضه ومد هيثم ايده ونادى احمد العراقى كده بقينا 17 سالى وانا كمان 17 اخيرا اتعادلنا فى عدد الاصوات فاضل صوتين وبس انا بصراحه برضه ماكنتش واثق انى حانجح بعد ماحسيت بالخيانه هيثم مسك الورقه وقال احمد العراقى كده اتقدمت كمان مش بس اتعادلت الوقت ده حسيت ان الورقه الاخيره لصالحى وقمت وقفت وفعلا نادى هيثم احمد العراقى وكل الناس قاموا مش مصدقين بعد ماكنا فقدنا الامل كسبنا وطبعا الكل وقف وهلل واظهر السعاده سواء اللى عطونا صوتهم وطبعا ده حقهم او اللى خانونا وعطوا الوطنى لانهم مش عايزين يظهروا انهم خانوا .
بصراحه على اد ما فرحت اننا كسبنا الحزب الوطنى على اد ما اتصدمت من خيانه احزاب المعارضه لبعضها واحده من حزب الشعب سلمت عليا وهى فرحانه اوى وقالتلى انا والله عطيتك صوتى لانك الافضل وبت على زمايلها من حزب الشعب وكأنها بتعاتبهم انهم عطوا الوطنى , انا طبعا شكرتها وقلتلها مش مهم انهم عطوا صوتهم لحد تانى المهم انك تفهميهم بعد كده ان ده غلط , انا كان نفسى زى ماقلت لاستاذ حسن اننا بعد مانكتسح الانتخابات ده لو كانت احزاب المعارضه توحدت اننا احنا الشباب حانكتب طلب موحود حايتقدم لكل رؤساء احزاب المعارضه المصريه نطالبهم بالاتحاد والعمل سويا لكن للاسف ده ماحصلش من الشباب وباعونا للوطنى .

اخيرا احب اشكر الدكتوره نورهان اللى قررت عمل انتخابات بالمنتدى .

كمان لازم اشكر الاستاذه عزه اللى طول الدوره مهتمه بينا كاننا اولادها و اكتر .

وطبعا اشكر ايهاب (هانى ) وابراهيم من الناصرى وحسن ومنيره من الاتحادى الديمقراطى وسميه ورحاب من الخضر ووعمر عادل من العمل وجهاد وتامر وولاء وصاحبة ولاء وعمرو حسين من الغد واتنين من الوطنى مش حاول اسمهم وكمان اشكر الناس المحترمين اللى كانوا صرحاء جدا وقالوا مش حايدونا اصواتهم وهم محمود رزق من التجمع وابطل صوته والتلاته التانيين من التجمع وكمان اشكر اعضاء الحزب الوطنى ولكنى لا اشكر الاحزاب التى خانتنا فاعضاء الحزب الوطنى اشرف منهم

سيب مكانك بدل مش قادر تحل مشاكل الشباب وانا بطلب انى اكون رئيس المركز القومى للشباب

النهارده اليوم التالت من الدوره كالعاده صحيت ودخلت استحميت رغم انى عارف انى مش حاعرف افضى البانيو بس ماليش دعوه ليه مش رابطين السداده بسلسله طلعت حضرت شنطتى لاننا كنا مسافرين بعد انتهاء المحاضرات , ونزلنا فطرنا كالعاده وركبنا اتوبيسنا وروحنا والنهارده كان يوم مختلف عن باقى الايام لانه يوم الانتخابات اول محاضره بدأت وكان فيها السفير ولاء مش فاكر بقيت الاسم وهومساعد وزير الخارجيه لشئون حقوق الانسان , كلمنا عن حقوق الانسان بالخارج كلام نظرى كده ومكرر دايما بنسمعه بس طبعا انا ماسكتش قلت طالما بيتكلم عن حموم الانسان يبقى لازم برضه نشوف حموم الانسان بمصر فسالته عن الاتفاقيات الدوليه لحموم الانسان اللى مصر وقعت عليها كأتفاقيات حقوق الطفل واللاجئين ومناهضه العنصريه ومناهضه الاتجار فى البشر ووغيرهم وان مصر لم تنفذ ايا من هذه الاتفاقيات وطبعا قلت امثله بس ماشاء الله دبلوماسى فعلا ردوده رغم انى ماقتنعتش بيها الا انه اجبرنى على احترامه لذكاءه وسرعه بديهته وطريقة تبريره لكل تجاوز تم
ولكنه اغفل سؤالى كيف يتم محاسبة مصر على هذه التجاوزات ؟
ثم كانت المحاضره الثانيه للدكتور محمد صفى الدين خربوش رئيس المجلس القومى للشباب المحاضره دى كانت مهزللللللللللللللللله
لو فاكرين كلامى عن محاضرة كمال الفيومى عميد الكليه السابق فى اليوم التانى من الدوره لما اتزنق فضل يقولنا انا ماليش دعوه قلولهم هما على قيادات الوطنى انا بقى بالصلاة على النبى ماصدقت جالنا احد قيادات الوطنى وكمان مسئول عن الشباب , الراجل فضل يتكلم ويتكلم ويتكلم عن الشباب وممارسه حقوقهم ومشاركتهم وعن الانتخابات والعدل والعداله والديمقراطيه بصراحه ماكنتش عارف هو بيتكلم عن ايه بالظبط عننا احنا ولا الشباب اللى فى انجلترا وفرنسا كان بيتكلم وكأننا احنا الشباب المقصرين ونستاهل ضرب الجزمه .
اتكلمت واحده من الوطنى سالت سؤال تافه جدا ازاى الشباب يعرفوا يفكروا بصوره جيده هههههههههههه انا كنت بغلى بصراحه من الراجل ده لانه مش بس وطنى وبيقول كلام مش بيحصل لا لانه كمان مسئول طلبت الكلمه واتكلمت وفتحت فى الكلام طبعا وقلت ابدأ بكلامه هو اللى قاله ( لا نظام ديمقراطى بدون مشاركه , سياده راى الاغلبيه واحترام راى الاقليه , كل من بلغ 18 عام يقيد فى الجداول الانتخابييه ) قلتله ان كلامه كله نظرى وبعيد عن الواقع تماما ومش حانصدقه وايه فايده ان المواطن المصرى اللى بيبلغ 18 عام بيقيد فى الجداول الانتخابيه فى نفس الوقت اللى بيتمنع انه يروح يدلى بصوته ويقابله بالاف من عساكر الامن المركزى امام اللجان وانت بتتهمنا اننا مش بنرشح نفسنا احنا عارفين ندلى بصوتنا لما نقدم طلب ترشيح وتطبيقا لكلامك مصر مافيهاش مشاركه يبقى مافيهاش نظام ديمقراطى احنا فى نظام دكتاتورى مستبد وطبعا حبيت اختم كلمتى بأكتر حاجه تنرفزه وهى سن الشباب قلتله سن الشباب من 18 الى 35 عام وحضرتك قلتلنا فى محاضرتك اهل مكه ادرى بشعابها يبقى الشباب هما ادرى بمشاكلهم حضرتك ماشاء الله اكبر من كده بكتير يبقى سيب مكانك للشباب هو الكرسى مش حكر عليك انا بطالب انى اقعد مكانك لانى اولى منك انت ماعملتش اى حاجه للشباب لكن انا اعرف مشاكلهم واعرف ازاى احلها الراجل اتجنن وقال لو فلت تكلمنى بالطريقه دى انا حانسحب من المحاضره قلتله ليه علشان عايز اكون رئيس المركز القومى للشباب قالى لا مش كده بس مش حاقبل منك نصايح ههههههههههههههههههههههههههههههه انا مش عارف نصايح ايه وبعدين هو فى حد يقول مش حاقبل منك نصايح المهم سكتت , الراجل بعد كده بيقلى مش كل واحد يعارض زبس قولى ايه الحل , كل واحد يقعد على المنصه يقلنا ماتتكلموش وقلولنا ايه الحل , طيب بدل انتم يا بهوات مش عارفين الحل ماتسيبوها ماسكين ليه فى الكرسى بايديكم وسنانكم , والمصيبه انى لما اقلهم طيب حاقلكم الحل لبعض القضايا يتكلموا ويرفضوا يسمعوا , كأنهم خايفين يظهر اى حل ادامهم لاى حاجه عايزين البلد تفضل زى ماهى متاخره على ايديهم .
الناس المسئولين عن الدوره نادونى وطلعتلهم قالولى مالك زعلان ليه قلتلهم مش زعلان انا بتكلم بحريه ماحدش يقدر يكممنى قالتلى الدكتوره نورهان انت قلتله ايه قلتله زعلان اوى علشان قلتله سيب الكرسى بتاعك وانا حاقعد مكانك احل مشاكل الشباب قالتلى يا نهااااااار المهم طلبت منى اسيبه يكمل وماتكلمش واليوم يعدى وخلاص قلتلها حاضر انا عموما اتكلمت وانتهينا .
بعد كده جه معاد الانتخابات واللى حصل فى الانتخابات والمهزله التدوينه الجايه تقروها انتظرووووووووووووونا

اليوم التانى من منتدى شباب الاحزاب

اليوم التانى من الدوره انا صحيت الساعه 6 الصبح وماعرفتش ارجع انام تانى لاقيت محمود رزق رجع و نايم انا ماكنتش عارف اعمل حاجه فلت قاعد لحد الساعه 7 ونص قلت اروح استحمى علشان افوق شويه لاقيت جهاد طلعلنا هو قعد يحى محمود وانا دخلت استحمى وطبعا غنينا الميه تروى العطشان وتطفى نار الجربان االمشكله انى بعد ما استحميت حاول اشيل السداده اللى فى البانيو مش بتتشال كانت ساقطه لتحت وبقيت مش عارف اعمل ايه البانيو مليان ميه ومش اى ميه ده انا مستحمى فيها انا زهقت من كتر المحاولات وماعرفتش افضى البانيو فلبست هدومى وطلعت وخلاص بقى , لما طلعت قلتلهم دخل جهاد حاول يفضيه ويشيل السداده بمفتاح برضه ماعرفش فسبناه كده قلنا لما يطلعوا ينضفوا حايفضوه هما , نزلنا بعد كده نفطر وكان بوفيه اوبن واحنا بنفطر لاقينا مجموعه من الممثلين منهم هيثم مش فاكر باقى اسمه هو ممثل شاب كانوا نازلين فى نفس الفندق , وهو داخل سلم علينا بس احنا استعبطنا وماردناش السلام لحد دلوقتى مش عارف ليه يمكن لانه فاكر نفسه مشهور بقى والمفرو نجرى عليه او حقد عليه مش عارف بصراحه , بعد الفطار طلعنا الاتوبيس وروحنا على الدوره بكلية الاقتصاد المحاضره الاولى للدكتوره ايناس ابو يوسف عن مهارات الدعايه الانتخابيه بصراحه انا اتخنقت منها لانها بتتكلم كلام بعيد عن الواقع وبتتكلم عن شغل الشارع وازاى ننزل للناس طبعا ده فى ظل حكم الحزب الوطنى وامن الدوله مش بيحصل
بعدها كان فى استراحة الشاى اللى مافيهاش شاى بره قطعة كرواسون اللى طعمها حلو اوى والعصير , والمحاضره التانيه كانت بعنوان تجربتى الانتخابيه جابولنا فيها واحده وكيلة المجلس المحلى لاسوان طبعا حزب وطنى وواحده تانيه عضو مجلس محلى باسكندريه بتقول انها كانت اصغر عضو مجلس محلى سنه 1980 كان عمرها 30 سنه ولحد دلوقتى متبته فى الكرسى اللى اخدته سنه 80 وبرضه حزب وطنى طبعا وكان بيدير الحوار دكتور اسمه كمال المنوفى العميد السابق للكليه
بصراحه كلامهم استفذنى جداااااااااااااااااااا حاجه بجد مش معقوله منتهى النفاق والكدب فضلت قاعد مستحمل مستحمل مستحمللللللللللللل بس لامتى كلامهم ول لدرجه انهم يتهمونا اننا مش عايزين نشارك فى الحياه السياسيه وطبعا كل واحده منهم وهو الدكتور ده بيتكلموا عن تقصير الاحزاب السياسيه وعن تقصير الشباب واننا مش بنروح نقدم فى الانتخابات ونترشح ومش بنروح نصوت طبعا انا وجهاد ومحمود من التجمع ظبطناهم وطلعنا فيهم وقلنالهم انتم بتتكلموا عن مسرحيه والكلام ده مش حقيقى الحزب الوطنى بيستعمل الامن وبيمنعنا من المشاركه بنضرب وبنعتقل وطلعنا كل قرفنا فيهم الدكتور كمال المنوفى بدأ يرجع فى كلامه ويلنا انا بعترف فى تجاوزات ولما بدأت اوجهله الاتهامات قالى انا ماليش دعوه انا صحيح عضو بالوطنى بس ماليش دعوه قلهم هما هما مين يقصد قيادات الحزب كل مانكلم حد فى الوطنى يقول ماليش دعوه والتجازات موجوده بس انا ماليش دعوه ويرجع يدافع بقوه عن الحزب الوطنى كأن الحزب حاجه والتجاوزات اللى بيعملها الحزب حاجه تانيه خالص
خلصت المحاضره بعد ما الناس اتبهدلت مننا بصراحه ماعتقدش انهم ممكن يشاركوا مره تانيه فى حاجه زى كده
الساعه 3 بدأ الغدا وكان زى اليوم اللى قبله برضه بس بدل الكباب والكته كان نص فرخه قلنا يالا زى بعضه ناكلها وخلاص قال يعنى الفراخ مرميه فى كل حته واحنا مش عايزين
المحاضره التالته فى اليوم ده كانت للاستاذ اشرف الدعدع رئيس مؤسسه الانتماء الوطنى لحقوق الانسان وكانت عن التشبيك مع منظمات المجتمع المدنى براحه اشرف الدعدع نسانا القرف اللى شوفناه فى المحاضره اللى قبليه رغم انه لم يوجه اى انتقادات لاى حزب الا انه امتعنا وافادنا بالحديث عن منظمات المجتمع المدنى ككل وعن كيفية حل الخلافات وتاثير الخلافات على الاحزاب وتاثير اختلاف الافكار على الاحزاب بجد استفدنا كتير منه ويا ريت نقدر نطبق اللى قاله ونحل خلافاتنا
بعد المحاضره نزلنا الاتوبيس وصلنا للفندق طلعنا غيرنا هدومنا وكان هانى من الحزب الناصرى عازمنا على مسرحيه فى مسرح الدوله لفرقه من اسكندريه مش فاكر اسم المسرحيه بالظبط روحنا كلنا الا جهاد من الغد وابراهيم من الناصرى ورحاب من الخضر فضلوا يناموا ومحمود من التجمع راح يقابل اصحابه , علشان نروح المسرح العايم دوخنا السبع دوخات اتقسمنا مجموعتين الاولى كان احمد وخليفه من حزب الشباب وعمرو حسين من الغد بس مش بيقعد معانا بالفندق وتامر من الغد
المجموعه التانيه كانت بتضم بصوا مين بقى استاذ حسن ومنيره من الاتحادى الديمقراطى وهانى من الناصرى وعادل من الشباب وسميه من الخضر وهبه من الدستورى برضه مش بتقعد معانا بالفندق وانا كام واحد احنا بقى 7 ركبنا كلنا تاكسى واحد ومش احنا اللى طلبنا السواق هو اللى قالنا نركب كلنا ركب استاذ حسن وعادل ادام ومنيره وسميه وهبه على رجل منيره وقعد هانى وانا جمبهم وقفلنا الباب
فضل السواق يلف بينا وماكنش عارف المكان بس كانت فسحه جميله بالتاكسى واحنا قاعدين كاننا فى علبة سردين بعد نص ساعه وصلنا المسرح العايم رغم ان المشوار كله مايخدش 10 دقايق بس كنا تايهين وسالنا كتير على مكانه واحنا فى السكه اتصل بينا خليفه وبيقلنا على مكان المسرح بعد ماكنا سالنا وعرفنا مكانه بشارع البحر الاعظم , احنا وصلنا وبندور عليهم مش لاقيينهم بعد كده عرفنا انهم لسه تايهيين ومش عارفين يوصلوا وعاملين مفتحين علينا وبيقلولنا المكان , اتفرجنا على المسرحيه وكانت سياسيه كوميديه ساخره يعنى بتناسبنا كلنا او المفروض كلنا باعتبارنا احزاب معارضه طالع عينا . اثناء المسرحيه كانت حاتحصل مشكله كبيره بين استاذ حسن وهبه خليفه طلب سيجاره منه وقعدوا يهزروا مع بعض وبعدين استاذ حسن طلع السيجاره يديها لخليفه اللى قاعد فى الاخر جمب هبه فهبه مدت ايديها اخدتها توصلها فقطعتها ورمتها بالارض وداست عليها طبعا حسن اتجنن ازا ى تعمل كده فقالها انا ممكن امسكك دلوقتى ارميكى فى الارض وادوس عليكى بالجزمه انتى مش محترمه ولولا انى كنت قاعد بين هبه وحسن كان فعلا ضربها بس الحمد لله قدرت اهديه .
طلعنا اخدنا تاكسى بس عددنا كان اقل لان فى ناس كتير مشيت من المسرح راحوا لاصحابهم روحنا الفندق الساعه 10 لحقنا العشا لما رجعت قالولى جهاد لسه نايم طلعت احيه ومع انه واد رخم اوى شتمنى وفضل يزعق وانا بحيه بس ماشى انا عارف ان الواحد لما مش بيشبع نوم وحد يحيه بتنرفز جدا المهم نزلنا واتعشينا وجهاد وتامر طلعوا يناموا وانا طلعت بعد ساعه والباقيين راحوا يسهروا على القهوه
حكايه طويله ورخمه اوىىىىىىىىىىىىىىىىى يا ساتر على رخامتى هو انا لازم اقول كل حاجه كده بالتفصيل

حكايتى مع منتدى شباب الاحزاب واليوم الااول

يوم 10/مارس اتصل بيا المهندس السيد بسيونى رئيس حزب الغد باسكندريه بلغنى ان فى دوره لشباب الاحزاب بالقاهره وعطانى رقم تليفون المنظم مالحقتش اقفل التليفون اتصل بيا المنظم يبلغنى بالدوره وطلب حضورى نفس اليوم وحايحجزلى فى الفندق فطلبت منه انى احضر تانى يوم الصبح على معاد الدوره اللى مدتها 3 ايام والحمد لله ان ال 3 ايام دول ماكنش عندى شغل وصحيت الساعه 5 الفجر وكنت محضر شنطتى وطلعت على القاهره .
الساعه 9 ونص بالظبط وصلت كلية الاقتصاد والعلوم السياسيه بجامعة القاهره مكان انعقاد الدوره قابلتنى استاذه عزه المسئوله عن الدوره وسجلت اسمى واستاذه عزه دى تتحب من اول تعامل معاها طيبه جدا جدا جدا وكانت مهتمه بينا اوى بفطارنا وغدانا وعشانا واقامتنا وراحتنا ماكنتتش بتسيبنا ابدا
ضمت الدوره 12 حزب الغد والناصرى والاتحادى الديمقراطى والخضر والعمل والتجمع والوطنى والاشتراكى المصرى الشعب والشباب والدستورى والوفد
وبدأت الدوره الساعه 10 وكانت للدكتوره منى البرادعى عميد كلية الاقتصاد والعلوم السياسيه والاستاذه ميرفت قاسم مدير البرامج بمؤسسه فريدرش ايبرت وافتتاح الدوره
الساعه 10 ونص دخل علينا واحد زى العسل اسمه الدكتور صالح عبد الرحمن وعطانا محاضره عن النظام المحلى المصرى بين المركزيه واللامركزيه وكانت محاضره جميله جداااا مش بس علشان الموضوع لأ المحاضر كمان اكتر من ممتاذ وعنده قبول غير عادى , فى سؤال ساله لينا ممكن انتم تعرفوا تجاوبوا عليه ( لو معايا طياره او قطار او عربيه او عجله وانا عايز اديلك هديه تحب تاخد ايه منهم ؟ )
بعديه كانت استراحة الشاى هى ماكنش فيها شاى ولا حاجه كان بيتوزع فيها قطعه كيك بس جميله اوىىىىىىى بصراحه ومع الكيك علبة عصير ده بيكون الساعه 12 او 12 ونص .
المحاضره التانيه كانت للدكتوره نورهان الشيخ وكانت عن مهارات ادارة الحملات الانتخابيه اتكلمت معانا ببساطه شديده بجد كأنها واحده مننا مش دكتوره فى كليه , وفى محاضرتها طلبت مننا عمل انتخابات محاكاه لإنتخابات المحليات اترشح 16 واحد وكان سيتم انتخاب واحد فقط انا ماكنتش حارشح نفسى بصراحه لكن لقتها فرصه اخوض فيها انتخابات نزيهه فرفعت ايدى واترشحت وبدأنا نطبق طرق الدعايه الانتخابيه اللى قالت عليها الدكتوره نورهان الشيخ .
الساعه 2 كان معاد الغدا كانت وجبات جاهزه من محل مش فاكر اسمه بس بصراحه كانت ممتاذه اول يوم انا فاكر اكلنا ارز وبطاطس وطحينه ومخلل طبعا حاتقولو ده برضه غدا ماتقلقوش وكباب وكفته كمان .
المحاضره التالته كانت للدكتور السيد عبد المطلب غانم او الدكتور ابو عصام عن المجالس الشعبيه المحليه فى ظل قانون الحكم المحلى
الدكتور ده جامد اوى اوى اوىىى كمان هو شكله طالع عينه هاجم الحزب الوطنى وحكومه الحزب الوطنى ورئيس الحزب الوطنى او الحزن الوطنى زى مابيقول هاجم بشراسه وكان عنده حق فحكومه الوطنى افسدت الحياه بمصر بس من ناحيه تانيه شرح نظام الحكم المحلى بطريقه ساخره وممتعه جدا وكان بيطبق النظام ده على بيته هو ابو عصام ومراته ام عصام واولاده التلاته على اد ما ضحكنا طول المحاضره على اد ما استفادنا منه جدا جدا جدا.
انتهى اليوم الاول ونزلنا ركبنا الاتوبيس ورحنا على الفندق بالعجوزه سكنت مع محمود من التجمع اللى برضه وصل من اسكندريه فى نفس اليوم الحجره 707 وكانت جميله فيها تلفزيون وتكييف ودفايه وتلاجه مع اننا ماعملناش بيهم اى حاجه بس برضه الاحساس ان عندك الحاجه حتى لو مستخدمتهاش بيفرق كتير .
الساعه 6 ونص طلع جهاد وطلب ننزل نتمشى انا كنت عايز بس مش قادر ومحمود كمان فضل ينام
نزل جهاد وانا قعدت احضر للدعايه الانتخابيه بتاعت الغد كان معايا نشره صادره عن جمعبه كانت عن البرلمان كان فيه كاريكتير عن دور النائب والحملات الانتخابيه طبعا كاريكتير بيسخر من افعال الحزب الوطنى كان رسم الكاريكتير ده احد اعضاء الجمعيه انا صورت الكاريكتير ده وكبرته وكتبت عليه شعارات زى ( سنمارس دورنا الرقابى . لا للبلطجه . لا للفساد ) وكمان عملت برنامج انتخابى وكتبته فى سيبر جمب الفندق وماكتبتش اسمى لانى كنت اترشحت انا وجهاد وكنا لسه ماستقريناش مين اللى حايكمل فينا
الساعه 9 ونص رجع جهاد ونزلنا نتعشى فى مطعم الفندق كان العشا ارز وخضار ونص فرخه بانيه والشوربه طبعا .
بعد العشا البنات اللى معانا فى الفندق طلعوا يناموا منيره من الاتحادى الديمقراطى وسميه ورحاب من الخضر واحنا روحنا على القهوه كنت انا وجهاد وتامر من الغد وهانى وابراهين الناصرى ومحمود التجمع لعبوا طاوله والساعه 2 انا سبتهم ورجعت نمت كان معانا الاستاذ حسن من الاتحادى الديمقراطى وخليفه واحمد وعادل من الشباب فى نفس الفندق وانتهى اليوم الاول

انور بيه يا انور بيه كيلو اللحمه بقى بجنيه

انور بيه يا انور بيه كيلو اللحمه بقى بجنيه

النهارده 6 مارس خلصت شغلى الساعه واحده الظهر وروحت ادور على ماكينة صرافه تابعه

السادات ينظر الى مستقبل مصر فوجده مظلما

للبنك الاهلى تكون شغاله لان الكل مش شغال زى العاده روحى شارع صلاح سالم فى اتنين موجودين فى نفس الشارع الناس اللى واقفين فى الطوابير ادامهم بيقولوا انهم بيشتغلوا وبيطلعوا فلوس بس بعد اكتر من محاوله وبطيئه جدا , انا قلت مش مشكله بقى اهو احسن من العطلانين التانيين بقالهم كام يوم وماحدش بيصلحهم

فى الطابور بدأت تعليقات الناس كالعاده اللى يقول ده زحمه اكتر من طابور العيش وفعلا كان الطابور كبير كأننا ادام فرن وفرن بيسرق الدقيق كمان , فردت عليه واحده قالتله حرام عليك بلاش سيرة الفرن احسن كده يبقى مش حاناخد فلوس النهارده زى مابنقف فى طابور العيش وفى الاخر بنروح من غير رغيف واحد , راح طالعلنا واحد تانى وقعد يهزق فى كل الشباب: هى البلد لسه فيها رجاله , الرجاله ماتوا خلاص فى حرب 67 واللى اتبقى ماتوا فى 73 هما الشباب الايام دى رجاله مش فالحين فى حاجه مش لاقيين ياكلوا وعواطليه وبيشحتوا وكل همهم الكوره والاغانى والهبل , زمان لما السادات غلى الاسعار طلعنا كلنا من كلياتنا وعملنا مظاهرات ضد قراراته فين الشباب دلوقتى نايمين او على القهوه متلقحين , وقعد يفرجنا على اثار رصاصه فى وشه بيقول رصاصه رش , طبعا انا مش عارف يعنى ايه رش انا اعرف البندقيه الرش دى اللى بصطادوا بيها العصافير , واحد تانى واقف فى نفس الطابور دخل فى الحوار قاله وانا اهو الرصاصه جاتلى فى صدرى وقعد يفرجنا ( كنت عايز انا كمان افرجهم على اى حاجه بس مالقتش حاجه فيا ليها قيمه يتفرجوا عليها ) دخل تالت فى الحوار الداير قالهم ايام زمان طلعنا كلنا نهتف ضد انور السادات ونقول انور بيه يا انور بيه كيلوا اللحمه بقى بجنيه وتانى يوم انور السادات استجاب ورخص الاسعار لكن دلوقتى مبارك حتى مابيسمعش عمال يغلى فى الاسعار ومش بيبص على الشعب عامل ايه حايقدروا يشتروا ولا حايموتوا من الجوع , رد الاول قال المشكله مش فى مبارك المشكله فى الشباب الهايف بتاعنا مابيعملوش حاجه فضلوا يحطولهم هرمونات فى الفراخ لحد ماطلعوا مش رجاله , انا اتخنقت من الراجل اللى عمال يدينا على دماغنا ده وبيتكلم وبس وقلتله طيب لو عملنا مظاهره دلوقتى علشان الغلاء حاتشارك معانا قالى احنا كبرنا خلاص وعملنا اللى علينا علشان البلد وعايز يورينى مكان الرصاصه الرش اللى فى وشه , قلتله انا شفتها بس انت شكلك ماكملتش 45 سنه لسه وواقف اهو على رجلك بقالك اكتر من نص ساعه فى الطابور ولسه حاتقفلك اكتر من نص ساعه تانيه , قالى يا عم قلتلك السادات كان بيسمع اما الراجل اللى معانا دلوقتى مابيسمعش احنا غلطنا غلطة عمرنا يوم ما سبناه يمسك الحكم سنة 1981 , قلتله طيب نعمل ايه دلوقتى , قال واحد رابع فى نفس الطابور اللى مابيتحركش نبطل ناكل فراخ لمده سنتين علشان اثار الهرمونات تروح ونرجع رجاله من تانى ردت عليه مراته وكانت واقفه جمبه بذمتك واحنا شمينا ريحتها بقالنا خمس شهور من يوم ما عزمنا اخوك على الغدا !!!

شكرا امن الدوله نردهالكم فى الافراح

شكرا امن الدوله

ايميلى على الياهو كان مسروق ولحد دلوقتى ماعرفش مين اللى كان سرقه طبعا الايميل ده عليه اكتر من 700 ايميل لصحفيين وسياسيين واصحابى
بعد ما اتسرق اتقطعت كل صلتى بناس كتير ماكنتش بكلمهم غير عن طريق الايميل
الحرامى اللى سرقه طلب منى كروت شحن موبايل مقابل انه يبعتلى الباس وورد انا طبعا رفضت لانى اولا ماضمنوش لانه حرامى ممكن ابعتله كارت الشحن وبعدين مايوصلنيش منه اى حاجه
كمان انا لو بعتله كروت الشحن ماهو ممكن يسرقه تانى ويطلب تانى فكده كده ماكنمتش حابعتله
عملت محضر بسرقة الايميل بتاعى لانه كان ممكن الحرامى يكون امن ويبعتوا من على ايميلى رسايل او شتايم لناس تبعهم فيروحوا يعملولى انا محضر , نائب مأمور قسم محرم بك اول ما قلتله الموضوع ان انا احمد عراقى نصار المحامى ورئيس المركز الاعلامى بحزب الغد وان فى واحد سرق ايميلى اللى عليه حوالى 600 صحفى وسياسى وشخصيات عامه اهتم جدا بالموضوع وجاب امين شرطه قديم عملى المحضر ونائب المأمور اخدت المحضر واشر عليه للعرض على النيابه فى نفس اليوم , ولحد دلوقتى مش عارف ليه الاهتمام ده يمكن علشان الموضوع جديد او يمكن شاف ان الموضوع خطير بجد لانه لو واحد عادى ممكن يبعت دعوه لمظاهره من على ايميلى فيتجمع الناس فى المعاد
روحت النيابه وكيل النيابه كان عارفنى من يوم ماروحت علشان التحقيق فى الشكوى ضد وزير الداخليه وطلب رفع الحصانه عنه , وكيل النيابه امر بارسال المحضر لمباحث الانترنت للتحرى عن شخصية المتهم ,
النهارده الاثنين 3/3/2008 لاقيت حرامى الايميل فتح ايميلى وكلمنى الساعه 10 مساء وبيسلم عليا وبيقلى انا حارجعلك الايميل وخد الباس وورد اهو وبعته , قلتله وليه الكرم ده كله انا برضه مش حابعتلك كروت شحن ولو عايز تلحق تغير الباس وورد يالا بسرعه قبل ما ادخل انا اغيره , قالى لا يا عم انا مش عايز ايميلك ده انا مش ادكم انتم ناس عندكم مشاكل مع امن الدوله وبيبعتولك تهديدات وانا مش ناقص وماليش دعوه بالايميل ده
قعدت اضحك اول مره استفيد من امن الدوله ومن تهديدهم ليا
شكرا امن الدوله نردهالكم فى الافراح

امن الدوله بيهددونى وقال ايه انا خفت يا جدعان هاهاها

يعمل ايه المواطن اللى معاه حكم ضد وزير الداخليه ومدير فرع مباحث امن الدوله باسكندريه

بتعويضه خمسين الف جنيه عن فتره اعتقاله وعايز ينفذ الحكم ده وهما رافضين , يعمل ايه المحامى لما يحاول اتخاذ اجراءات تنفيذ الحكم فيوصله تهديد من امن الدوله باعتقاله اذا استمر فى المطالبه بحقه وحق موكله يعمل ايه المواطن لما يتقبض عليه ويضرب من امن الدوله ويطلبوا منه يلغى التوكيل اللى عامله للمحامى , يا ترى يلغيه ولا يستمر فى المطالبه بحقه , مين يجيبله حقه ويحميه من امن الدوله
كتبت قبل كده عن تقدمى بطلب لرفع الحصانه عن وزير الداخليه وارسال انذار له ولمدير فرع مباحث امن الدوله باسكندريه بتنفيذ حكم قضائى بتعويض موكلى بخمسين الف جنيه والا سارفع جنحه مباشره ضدهما ومن اجل رفع جنحه مباشره ضد وزير الداخليه يجب ان ترفع عنه الحصانه اولا لانه عضو بمجلس الشورى اقلكم بقى الحكايه

اليوم الاحد 2 مارس 2008 ذهبت لمحكمة محرم بك للكشف على بعض القضايا وعند وجودى بالمحكمه قابلت عبد الرازق محمد جمعه وهو موكلى الى سبق ان تقدمت بطلب لرفع الحصانه عن وزير الداخليه لامتناعه عن تنفيذ الحكم الصادر لموكلى بتعويضه ب 50 الف جنيه عن الفتره التى قضاها بالمعتقل 9 سنوات بدون اى اتهام او جريمه كما ارسلت انذار لمدير فرع مباحث امن الدوله بالاسكندريه حيث انه مدعى عليه ثانى فى نفس الحكم وطالبته بتنفيذ الحكم والا سيتم رفع جنحه مباشره لامتناعه عن تنفيذه والعقوبه المنصوص عليها فى قانون العقوبات لمن يرتكب جريمة الامتناع عن تنفيذ حكم قضائى هى الحبس والعزل من الوظيفه وذلك وفقا للماده 123 من قانون العقوبات .

نرجع لموضوعنا لاقيت عبد الرازق بيجرى ولما شافنى وقف وقالى انا حالغيلك التوكيل قلتله ليه بس كده وانا مبتسم قالى امبارح السبت قبضوا عليا فى امن الدوله واضربت فى كتفى وقالولى عايز تحبس وزير الداخليه ومدير امن الدوله باسكندريه انت والمحامى بتاعك احمد عراقى بتاع حزب الغد فقالهم انا ماليش دعوه انا سلمت الاوراق للمحامى وهو اللى بيتصرف وبينفذ الحكم وانا ماعرفش حاجه, قالوله بكره تلغى التوكيل للمحامى ده وتجبلنا شهاده بانك لاغيت التوكيل , قلتله ليه يا شيخ رزق لو عايز تلغى التوكيلعلشان انا قرت فى قضيتك ده حقك لكن انا ماقصرتش ومعرض نفسى للمشاكل علشانك , قالى انا عندى عيال وخايف . قلتله لو عايز تلغى التوكيل الغيه انت حر بس انت كده سبت حقك وحق البلد لانك كده بتديهم فرصه انهم يستمروا فى عدم تنفيذ الاحكام القضائيه , الراجل سابنى ومشى ومش عارف حايعمل ايه المهم وهو ماشى قالى خلى بالك على نفسك لانه قالى انه مش حايسيبك وحايجيبك امن الدوله

هو ده اللى حصل النهارده فى بداية اليوم

امن الدوله يقبضوا على موكلى علشان يضغطوا عليه انه يلغى التوكيل علشان ماقدرش استمر فى المطالبه بتنفيذ الحكم الصادر لصالحه وعدم مطالبتى برفع الحصانه عن وزير الداخليه باعتباره عضو بمجلس الشورى وعدم ملاحقه مدير فرع مباحث امن الدوله بالاسكندريه الرافض تنفيذ الحكم

عليه العوض ومنه العوض فى البلد

دى صورة الانذار المرسل لامن الدوله ووزير الداخليه وعليه تاشيره قاضى الامور الوقتيه اللى وافقلى على عمل الانذار يعد مارفض محضرى المحكمه عمله مجامله لامن الدوله او خوفا منهم وبعد وصوله لامن الدوله تم القبض على موكلى وتهديده بالغاء توكيلى , طبعا ازاى مواطن مصرى يبعت انذار لامن الدوله ده اتجنن ده ولا ايه