يالا بينا نضحك ده احنا المصريين

النهارده الجمعه 29فبراير الساعه 11 مساء لسه راجع البيت وفتحت الانترنت اول خبر عينى وقعت عليه هو استشهاد فتاه مصريه كانت تلعب امام منزلها برصاص جنود اسرائليين

طبعا مبارك حايطلع ويقلنا ماتزعلوش دى مجرد غلطه
غلطه قتلت بنت مصريه غلطه ضيعت احلام وامال وسعاده عائله بكاملها بل احزنت كل المصريين
طبعا مبارك مش ناوى حتى يفتح بقه ويقول ماتزعلوش وهو ليه اصلا يقول طالما الشعب مش حايتكلم ومابينطقش بجد حاجه تقرف بقينا نبص للشعب نحس انهم شويه معاتيه شويه ناس هاطله كل حاجه يضحكوا وبس فى موت فى فرح واحد بيتعذب ادامهم واحد مش لاقى ياكل واحده مسروق منهوب مقتول يبصوا ويضحكوا بقى بالذمه مش شعب اهطل ؟

يالا بينا نضحك يالا بينا نضحك

يالا بينا نضحك يالا بينا نضحك

ده احنا المصريين دايما فخورين بجدودنا اللى مننا مستعرين

يالا بينا نضحك ده احنا المصريين

دايما فرحانين سعداء مبسوطين

دايما مرتاحين ولا شكوى ولا انين

دايما مغمضين وفى حالنا عالطول قاعدين

نبص للظالم ونبص شمال ويمين

علشان ندعى عليه واحنا مطمنين

اصلنا يا جماعه عالطول خايفين

ومن خاف سلم وعاش ماحدش يدرى بيه

ندعى بصوت عالى او واطى اطمنوا ماتقلقوش

فى الحالتين ربنا سامعنا وملايكته بتقول امين

يبقى ايه لازمتها الجرسه وتعلية الصوت

مانوطى صوتنا شويه بدل الخوف مايموت

ونتضرب يالقفا ونبتسم عالطول

اصل القفا وفا لشعب عاش مذلول

يالا بينا نضحك

احنا اخرنا مدير الامن لكن وزير الداخليه ماعملنهاش قبل كده

صحيت النهارده الخميس 21 فبراير كالعاده الساعه 8 ... النهارده كان عندى شغل بس يعنى مش كتير الاول اروح محكمة محرم بك استلم انذار كنت عامله لموكل نصاب كسبتله قضيته وصرف التعويض ودفع نص الاتعاب وهرب بس هو حايروح فين سواء هو او مراته اللى عملت نفس الموضوع من حوالى سنه , بعد ما استلم الانذار حاطلع لنيابة محرم بك اعرف طلب رفع الحصانه عن وزير الداخليه لامتناعه عن تنفيذ احكام قضائيه اللى كنت قدمته للمحام العام الاول وقرر تحويله لنيابة محرم بك حصل فيه ايه وبعد كده اروح المنشيه ومجلس الدوله , المهم استلمت الانذار وكان اعلن ادارى يعنى اعلن بالقسم لان وقت الاعلان ماكنش فى حد موجود بالبيت , طلعت بعد كده اسال على الطلب والشكوى ضد وزير الداخليه لاقيت الطلب موجود عند موظفه اسمها كريمه بمجرد انى قلتلها موضوع الطلب عالطول طلعته وقالتلى روح بسرعه لعم ابراهيم فى الحجره بالناحيه الاخرى علشان الطلب عنده , روحت لعم ابراهيم وطلع الصول ابراهيم , سالته فى طلب باسم احمد عراقى ضد وزير الداخليه فرد محاولا المزاح معى يعنى مين ده احمد عراقى وكان يتوقع اننى سأبتسم إلا اننى بكل برود نظرت اليه كررت فى طلب باسم احمد عراقى ضد وزير الداخليه فكرر ايضا مقولته هو مين ده احمد عراقى ولكى يحفزنى على الابتسامه ابتسم هو ونظر باتجاهى فوجدنى انظر اليه وانا لا يوجد على وجهى اى تعبيرات فما كان منه الا ان قام مسرعا يفتح الدولاب الخاص به ويخرج الطلب , وبدأ بفتح محضر وسالنى ايه هو موضوع شكواك فرفضت ان يسالنى مره اخرى لان موضوع الشكوى بالطلب فطلب منى ان اقول ان شكوتى بالطلب المقدم قلتله حاضر اكتب كده , بعد ما كتب سالنى انا طلباتى ايه قلتله مانا قلتلك بالطلب شكوى ضد وزير الداخليه ومدير فرع مباحث امن الدوله باسكندريه لامتناعهم عن تنفيذ احكام قضائيه وبطالب ايضا برفع الحصانه عن وزير الداخليه , كتب كلامى وقالى عن وزير الداخليه بس ماترفعها عن اللى اكبر منه ده الزيت بقى ب 9 جنيه والسكر والدقيق ولا الفول مابقناش نعرف نجيبه علشان ناكل , خرج علينا واحد ماعرفوش قال مابلاش كلام فى السياسه قلتله وهى فين السياسه دى بس الراجل بيتكلم فى الاكل يعنى مش كفايه مش عارف ياكل ولا ياكل عياله كمان مايشتكيش .
المهم عم ابراهيم الصول الذى اقترب من الستون ولا يعرف ان يدبر الغذاء لأولاده اصطحبنى لحجرة رئيس النيابه , قال لى رئيس النيابه احكيلى طلباتك قلتله تانى مانا قلت لعم ابراهيم وبل عم ابراهيم قلت بمديريه الامن , قالى طيب قولى حكتله الموضوع تانى وفى الاخر عايز ارفع الحصانه عن وزير الداخليه لاتخاذ اجراءات الجنحه المباشره ضده , قالى بس مجلس الشورى مش حايرفعها عنه , رديت وقلتله بس ابعت الطلب والباقى على ربنا لان كده حرام ده ادامه اكتر من 20 الف حكم رافض ينفذهم , رد مبتسما 20 الف بس ده عليه اكتر من مليون حكم , قلتله اللى يهمنى اتخاذ الاجراءات القانونيه , قالى تمام وبعت لعم ابراهيم اللى طلعت عينه معايا فى اليوم ده وقاله ادخل لفلان بيه وهو وكيل النائب العام راح عم ابراهيم دخله الورق فنادى عليا فلان بيهدخلت لاقيت عنده 2 وكلاء نيابه والتالت ماعرفش برضه وكيل نيابه ولا ظابط ولا ايه , سالنى ايه طلباتك قلت لسه حاقولى انى سبق وقلت ان طلباتى مكتوبه بالشكوى وانى قلت طلباتى لعم ابراهيم وكمان رئيس النيابه . اختصاره للوقت قلتله فرد مبتسما بس ده مش اختصاصنا اننا نرفع عنه الحصانه بمجرد كلامه ده عرفت نهاية طلبى حاتكون ايه
قلتله انا عارف بس انت بتبعت لمجلس الشورى تطلب منه اتخاذ الاجراءات قالى ماهما مش حايوافقوا , رديت طيب انت اعمل شغلك وهما عليهم يعملوا شغلهم , قالى يا ابو حميد بص احنا هنا اخرنا مدير الامن استدعيناه وسالناه اما وزير داخليه فدى ماحصلتش قبل كده , فقال لى اخر كان يجلس امام المكتب لو عايز موضوعك يمشى قدم طلبك بالمكتب الفنى للنائب العام وهما يبعتوا لوزير العدل فوزير العدل لو وافق يبعت لمجلس الشورى يطلب من رفع الحصانه , طبعا ابتسمت جدا بقى وزير العدل حايطلب رفع الحصانه عن وزير الداخليه , قال لى اخر كان يجلس بجوار المكتب وهو يبتسم جدا وسعيد لدرجة اننى لا اعتقد انه يوم تعيينه بالنيابه كان اكثر سعاده من ذلك بص يا احمد انا فى واحد صاحبى انت ماتعرفوش قالى الشكوى لغير الله مذله , عملت نفسى مش سامعه انا مش ناقص ,وسالتهم ليه انتم رافضين تبعتوا لمجلس الشورى تطلبوا رفع الحصانه ده حقى فقال الاخير وكان يجلس بجوار ممكن نعملهاله امتناع عن تنفيذ حكم قضائى ونبعت لمجلس الشورى طبعا وش وكيل النيابه اللى قاعد على المكتب اتقلب وقالى بص يا احمد زى ماقلتلك انت تتوكل على الله وترفع جنحه مباشره على وزير الداخليه وتطلب من المحكمه التصريح باتخاذ اجاراءات رفع الحصانه , طبعا الكلام ده انا عارف كويس انه لا يجوز قانونا لان اى تحقيق او اجراء رسمى لا يجوز مع عضو مجلس الشعب او الشورى قبل رفع الحصانه , ولكنى تأكدت انهم لن يفعلوا شيء وفعلا قال لى سيتم حفظ طلبك , فبدأت اقف لكى اخرج فقال لى الذى بجوار المكتب ليستفزنى اكتر واحد صاحبى انت ماتعرفوش قالى الشكوى لغير الله مذله المره دى رديت عليه وقلتله لا الشكوى لغير الله مش مذله علشان كده انا بشتكيلك , اتحركت نحو الباب فقال لى من يجلس على المكتب وهو مشفق عليا خلى بالك من نفسك نظرت اليه بابتسامه منكسره
وفتحت الباب وخرجت وانا كلى اصرار ان استكمل مشوارى لاحصل على حقى ولتذهب نفسى اذا خافت الى الجحيم فلن تستحق ان اخاف عليها .

مش حاتقدر تغمض عنيك

مدونتى الجديده

حاكتب كل حاجه واى حاجه ومن غير كدبه واحده والى مش عاجبه مايدخلش يقرا

إنتظروووووووووونا