الواحد كل ما تمر عليه الايام يشوف كل حاجه حواليه متناقضه
كل حاجه مش حقيقيه وكأن كل الناس كدابه ومنافقه
اروح اصلى العشاء وصلاة التراويح فى مسج القائد ابراهيم بمحطة الرمل الاقى المسجد فيه حوالى 20 الف مصلى
عدد كبير جدا منهم اتوا
تصوير عمرو شريف
فقط لصلاة التراويح ولم يصلوا العشاء او غيرها من الصلاواتوكأن صلاة التراويح دى فرض وباقى الصلاوات سنه او يمكن بدعه
على الرغم من ان صلاة القيام سنه غير مؤكده والصلاوات الخمس فرض وصلاة العشاء حايتحاسب على تركها اما القيام فلن يحاسب اذا تركها
الا ان الناس اصبحوا يهملون الفرض ويحرصون على السنن اللى على مزاجهم
==================
كنت فى المحكمه كالعاده بخلص شغلى
وكالعاده برضه بندى الموظف حاجه علشان يخلص الشغل بسرعه
اوراقى خلصت وطلعت العشرين جنيه وحطتها فى جيب الموظف المرتشى
بعد مانتهيت وبجمع اوراقى الموظف المرتشى ده لاقيته قمة التناقض
قعدت يتكلم عن الفساد فى الدوله والناس اللى بتظلم باقى الناس واللى بياخد حاجه مش من حقه واللى واللى
طيب مانت لسه واخد رشوه يا ابن ........... هى الناس مابقتش بتحس
كنت انا والمهندس فداء لسه بنتكلم فى الموضوع ده صحيت الصبح لاقيته بيتحقق ادامى
===========================
امريكا وحقوق الانسان .
كل يوم امريكا مصدعانا بدعهما للديمقراطيه وحقوق الانسان والحريات
وبعد كده افاجأ ان المعونه الامريكيه عباره عن سيارات للأمن المركز وكلابشات لليد وعصاه للكهربا
هو ده فعلا الدعم فعلا معونه ملعونه
==================
واحد دقنه اتنين متر وقاعد يتكلم عن الاسلام وتقوى الله
وبعد شويه اتعارك مع واحد
فضل يشتمه هوواهله واللى جاب اهله وماسابش حاجه الا لما قالها
متهيالى لما دقنه توصل 2 متر وربع حايبقى محترم
=====================
اتباع البابا يعلنوا تاييدهم للشيخ جمال مبارك وانهم حايأيدوه وريثا للولايه
واتباع شيخ الازهر يعلنوا تاييدهم لموحد القطرين جمال مبارك واهنم برضه حايأيدوه
لالالالالالالا طالما كده وان جمال حصل على موافقة المسلمين والمسيحيين وحايوحد البلد ومش حايكون فى فتنه طائفيه
يبقى خلاص انا كمان لازم اقول برضه يسقط يسقط جمال مبارك
====================
هشام طلعت مصطفى اتسجن
فى السجن الاكل بييجى من بره واللبس من بره وحتى الزيارات يوميه وفى غير المواعيد الرسميه
وقاعد لوحده فى حجرتين ومساعد وزير الداخليه كل يوم بروح يزوره بنفسه خايف لينتحر
كل ده لييييييه ..... علشان عين امه عايز حلاق يجيله من بره السجن وادارة السجن قالتله حلاق السجن افضل
امال لما كنا مسجونين كانوا بينيموا الناس 25 فى اوده نايمين فوق بعض وهو لواحده قاعد فى اودتين
الاكل فى التفتيش بيبهدلوه والعساكر بتهرسه بايديها وهو الاكل بيجيله من الفورسيزون
فعلا لازم نقول ...... a 7 a
============
هناك 3 تعليقات:
والله هي حاجه تجنن وتخلي الواحد سشد شعره من الغيظ والله عندك حق تحياتي
اقولك حاجة سلمت بيها
كلنا بنعانى التناقض اخى
منهم انت و انا و كل الناس الى اتكلمت عليهم
من اول الواحد المرتشى الى بيتكلم على الفساد
و اللى انت اصلا ادتله الرشوة و بردة اهو بتتكلم عن الفساد
مش بقولك كلنا فى نفس الزجاجة
:)
كل سنه و انت طيب
تحيانى
معلش انا هحشر نفسي فى مدونتك بس البوست ده فعلا عاجبنى و هتكلم عن وجهة نظرى كبنت
بالنسبة للنفاق اللى انتشر بشكل ملحوظ جدا..الواحدة من دول محجبة او بمعنى اصح لابسة طرحة و نازلة شتيمة و تريقة على اللى مش محجبة بس تيجى تسألها عن الصلاة تبص فى السقف و ما تعرفش تنطق
و برضه الموظفة المحجبة اللى بتديك البوز المتين بدل ما ترد على صباح الخير او السلام عليكم مع ان الابتسامة صدقة بس بمجرد ما تشوف العشرة جنيه ممكن تقوم تبوس ايدك..ايه التناقض ده؟
امريكا بتشترط فى المعونة ان جزء مش قليل منها يروح لاستيراد القمح منها برضه..القمح و احنا هبة النيل
ما هم لو ما رشحوش جمال مبارك مش هيفضل لهم غير الاخوان فاكيد جمال ارحم
اسفة على الرغى ده كله بس البوست عجبنى فعلا
إرسال تعليق