المكان : سجن برج العرب بالاسكندريه
الزمان : 4 اكتوبر 2009
مده عملية اختراق اسوار الغباء : 6 ساعات
اليوم 4 اكتوبر 2009 ذهبت لزباره كريم عامر بسجن برج العرب شديد الحراسه بالاسكندريه وطبعا كنت مطلع تصريح نيابه بالزياره استعدادا لأى محاوله غبيه برفض زيارتى له
ذهبت الى بوابة السجن 9 صباحا وقدمت تصريح الزياره وكارنيه المحاماه الخاص بى وبدأ الغباء اول ماشوفوا إسم كريم عامر
امين الشرطه : انت حصلت على إذن وتأشيره وزير الداخليه على تصريحك ده
انا : إيــــــــــــــــــه
أمين الشرطه : أقصد حصلت على تأشيره رئيس مصلحه السجون على تصريحك ده
انا : ولا وزير داخليتك ولا رئيس مصلحتك له انه يوافق على إذن نيابه لأن فى فصل بين السلطات وما على وزير الداخليه اللى هو بيمثل السلطه التنفيذيه ينفذ اوامر المحامى العام اللى بيمثل السلطه القضائيه وليس من حقه يوافق او لا يوافق
امين الشرطه : هااااا
ملحوظه : طبعا طور الله فى برسيمه ولا فهم حاجه
انا : انا حاصل على إذن نيابه يا ريت تنفذه وبلاش اسئله كتيره
امين الشرطه : إذن النيابه بتاعك ده مايساويش ربع جنيه مخروم
انا : انت قليل الادب وانا حاقدم فيك شكوى لقيامك بسب جهه قضائيه
امين شرطه اخر : هو مايقصدش والله هات بس إذن النيابه ده هو المسجون اسمه عبد الكريم سليمان عامر مااشى انا حاسجلك اسمه بنفسى بس هات خمسه جنيه دمغه
هى طبعا مش بخمسه جنيه بس ماشى عطيته واستنيت الى الساعه 11 وبدأو ينادوا على اسماء المساجين علشان اهليهم يدخلوا يزوروهم
ونادوا على المجموعه الاولى وانا قاعدوالمجموعه التانيه وانا برضه قاعد والتالته والرابعه فقمت بئه حاقعد استنى ايه تانى الساعه بقت 12 ونص
سالت على التصريح بتاعى طبعا امين الشرطه اللى روحت سالته فرح اوى انى بساله علشان محامى واجابته ليا حاتكون بفلوس طبعا
قالى ثوانى اشوفهولك وساب الناس او باع الناس وراح يشوفلى تصريحى
رجع فسالته فين التصريح قالى ماعرفش ماليش دعوه اناقلتله يعنى ايه مالكش دعوه هات تصريحى قالى اسال على بوابة الزياره
روحت على بوابة الزياره سالت قالولى باسم مين قلتلهم عبد الكريم نبيل سليمان عامر
قالولى استنى طيب نستأذنلك هات بطاقتك .... قلتله تستأذن مين تانى ده تصريح نيابه مش محتاج استإذان
قالى طيب هات البطاقه علشان تدخل فعطتهاله
شويه ونادوا على المجموعه الخامسه وعلى المعتقلين السياسيين والجنائيين فرحت سالتهم الساعه بقت واحده ونص
انا : فين تصريحى وامتى الزياره
امين الشرطه : اصل مشكلتك مع امن الدوله مش معانا ..
. انا : وهو انتم مين !!؟
امين الشرطه : احنا مصلحة السجون وهما امن دوله
انا : وهما فين اللى مشكلتى معاهم خليهم يطلعوا اكلمهم وبعدين لما الموضوع بإيديهم من الاول ليه انتم بتاخدوا منى التصريح والكارنيه وبعدين البطاقه وكمان اخدوا منى خمسه جنيه هو انتم شغالين خدامين عندهم
امين الشرطه : اه استريحت بئه
انا : لا ماستريحتش لانى عارف الاجابه من الاول .. انا دلوقتى عايز ادخل طلعلى حد من امن الدوله
امين الشرطه : طيب استنى
فضلت مستنى للساعه 2 ومفيش فايده وانا مش ببطل اسئله وداخل طالع عليهم لحد مانادوا على اخر ناس واقفين ودخلوهم يزوروا وماتبقاش غيرى انا وحوالى 8 كانوا زياده عن العدد المسموح بيه من كل اسره والعجيب انهم بدل مايسيبوهعم يمشوا اخدوا منهم بطايقهم فلا دخلوهم يزوروا ولا سابوهم يمشوا يروحوا والناس عايزه تروح فسخنتهم وقلتلهم خبطوا على الباب واطلبوا مقابلة رئيس مباحث السجن يجبلكم بطايقكم والا مش حاتخدوها النهارده فالناس خبطت وزعقت وطلبوا بطايقهم فجالى الظباط وامناء الشرطه رغم انى مش انا اللى بطلب بطاقتى وقالى حاضر حانجبهالك علشان تمشى
قلتله لا انا حازور كريم عامر مش ماشى هما اللى عايزين يمشوا
قالى الساعه بقت 2 ونص خلاص مفيش زياره
قلتله ولايهمك وقلعت الجاكت بتاع بدلتى وفرشته على الارض جمب باب الزياره جوه السجن وقلتله التصريح لمده اسبوع وبكره اخر يوم فى الاسبوع فبدل ما ارجع بيتنا واكسل اجى بكره والتصريح ينتهى انا حاقعد هنا لبكره مش حاتحرك من مكانى فقفلوا الباب واكيد راحوا يسألوا اسيادهم نعمل ايه ؟
بعد خمس دقايق طلعلى واحد وقالى اتفضل علشان خلاص الزياره ميعادها انتهى
فطلبت منه يجيب زمايله ويطلعونى بره باب السجن بالقوه وساعتها حاطلع على مكتب المحامى العام اعتصم هناك
فقالى روح اعتصم وانا مالى
اناقلتله ماشى انا حاعتصم عنده واساله ليه بيدينى تصريح زياره طالما التصريح ده مالوش اى قيمه عند مصلحة السجون , وبدل هو اللى طلع التصريح ده يتصرف وحارفع قضيه عليه اطالبه بالتعويض
رجع الراجل وقفل الباب بعد خمس دقايق تانى فتح الباب وطلع منه اذكى مخبر امن دوله شفته فى حياتى ونادى بصوت عالى اوى الاستاذ احمد عراقى نصار فأنا بصتله وبقوم من على الارض فنادى تانى بصوت اعلى من المره الاولى احمد عراقى نصارفقلتله انت بتنادى على مين هو فى اى حد غيرى موجود قالى وانت ليه مش بترد عليا قلتله علشان انت عارفنى ومفيش غيرى فليه بتعلى صوتك
قالى طيب يالا بئه اتفضل الزياره دخلت من الباب واتقفل فقالى معاك تليفون قلتله لا سايبه بره علشان عارف الحجج بتاعتكم دى
جه الصول اللى على البوابه للتفتيش فقاله مخبر امن الدوله لا انا اللى حافتشه وفعلا فتشنى هو وقالى تعالى يالا
دحلنا عنبر الزياره وكان عنبر زيارة المحكوم عليهم بالإعدام !!؟
المخبر وقف فجأه المخبر : استنى التفتيش
انا : تفتيش ايه تانى انت مش لسه مفتشنى بنفسك بره
المخبر : لا بره كان تفتيش البوابه هنا تفتيش العنبر
انا : مانت اللى فتشتنى بره برضه مش حد غيرك يبقى حاتفتش ايه تانى
المخبر : هى دى الاوامر العنبر لازم فيه تفتيش
انا : يا عم مانت اللى فتشتنى بره لو كان الصول كان ماشى بس ده انت اللى فتشت
جالى امين شرطه عارفنى من ايام ماكنت معتقل بسجن برج العرب وسلم عليا وقالى معلش سيبه علشان تدخل تزور براحتك
فقلتله فتش يا عم وخلصنى
طبعا رجع فتش تانى ومالقاش حاجه زى اول مره فقالى بكل ذكاء ممعاكش حاجه ممنوعه !!
قلتله وانت كنت لاقيت بره حاجه ممنوعه قالى لا بس التفتيش هنا اختصاصى انا اما بره فاختصاص الصول بس هما قالولى فتشه انت مش الصول
دخلت العنبر ولاقيت كريم واقف مستنى ومفيش مكان نقعد فيه زياره للواقفين فقط والعنبر فاضى مفيهوش غير واحد محكوم عليه بالاعدام اهله بيزوروه من ورا السلك والمخبر وامين الشرطه واقفين جمبنا كتفهم بكتفنا
فقلتلهم ماتتفضلوا معانا هو انا جاى ازوركم انتم ولا ازوره فبصولوا بكل رخامه وماتحركوش من مكانهم قعدت مع كريم عامر قصدى وقفت معاه ربع ساعه وأكد لى انه خلص ملفه استعدادا للخروج يوم 6 نوفمبر وان ادارة السجن خلاص خلصت الملف وسالنى ايه انطباع الناس بره عنه ولسه فى اراء سلبيه ضده قلتله مش كتير زى الاول بس فى عضوه على الفيس بوك لاقيتها بتطالب فى تعليقها بالحصول على حق الله منك
قالى والاربع سنين اللى اتسجنتهم دول ماكفوهاش لسه ؟
وننتظر خروج كريم عامر يوم 6 نوفمبر 2009 ونطالب وزارة الداخليه بعدم التعسف معه فى اتخاذ اجراءات الافراج احمد نصار سجن برج العرب شديد الحراسهالاسكندريه
ليست هناك تعليقات:
إرسال تعليق