مذكرات 6 ابريل الجزء الثالث

مذكرات 6 ابريل الجزء الثالث

عقب سماعى بما اعلنت عنه حركة كفايه اتصلت على الفور بمنسق عام حركة كفايه بالاسكندريه وكان ذلك يوم السبت 29 مارس لأستفسر منه عن سبب تحديد مكان وميعاد اخر للتظاهر فرد عليا احنا حددنا الميعاد ولو عايزين تشتركوا معانا تعالوا ( كان وقتها يعتقد ان حركة كفايه لها من القوه التى تجعل القرار بأيديهم هم , لم يكن يثق بأن الشعب يستطيع ان يتحرك بمفرده وانه يجب ان يكون هناك قياده يتبعها او لم يكن على درايه بما يجرى من حوله ولم يكن متوقع نجاح او قوة الدعوه لاضراب 6 ابريل ) رديت عليه بأننا شغالين فى الدعوه منذ اسبوع وتم توزيع الدعوات بالشارع وان الناس هى التى توزع ولا اعرفهم بل هناك ملصقات شاهدتها تدعوا للاضراب والتظاهر بالمنشيه ولا اعرف من صممها ومن لصقها , كان رده لما نتقابل يوم الاربعاء نتكلم فى الموضوع ده طبعا يقصد الاربعاء 2 ابريل اى قبل 6 ابريل باربع ايام رفضت وقلتله لازم نتقابل قبل كده قالى لا يوم الاربعاء كويس وقفلنا على كده , طبعا من السبت الى الاربعاء كانت مصر كلها بتتكلم عن اضراب 6 ابريل وعن التحضير للنزول للشارع والتظاهر ضد الفقر والفساد بل ومن اجل تغيير النظام احيانا , كان تليفونى لا يكف عن الاتصالات التى استقبلها من اعضاء على الفيس بوك لا اعرفهم جميعهم يؤكدون على ميعاد التظاهر وانهم سيأتون ومعهم العشرات من زملائهم سواء بالجامعه او العمل الى ميدان المنشيه منذ الصباح , ادخل اى محل اجدهم يتحدثون عن اضراب 6 ابريل والتظاهر بالمنشيه , ذهبت لاشترى ورق لنكتب عليه لافتات من اجل ان نرفعها يوم 6 ابريل ونحن واقفون على سلم الحقانيه بمجرد ان عرف صاحب المحل الغرض من الشراء خصم نصف الثمن وحدثتنى سيده مسنه كانت بجوارى انها ستخرج هى واولادها الثلاثه للتظاهر بالمنشيه وايضا زملاء ابنائها , بعد شراء مستلزمات اللافتات ذهبت اخر اليوم لاشترى سندوتش فول من محطة الرمل وانا اقف بالمطعم سال رجل البائع انتم اجازه يوم 6 ابريل , توقعت ان البائع سيقول له لا خاصة ان المطعم كبير ومشهور ولكن قال له حتى لو مش اجازه مش حانيجى انا حاروح المنشيه فرد زميله الحمد لله انى باخد اجازتى يوم الاحد يعنى كده كده رايح كانت بعض الطالبات الجامعيات تقف بأول المطعم امام الكاشير سالهم البائع طبعا بيعاكسهم انتم حاتروحوا الكليه اليوم ده قالولوا لا مش رايحين حانشارك فى مظاهرة المنشيه فسالتهم مش معقول كلكم حاتيجوا تشاركوا فى المظاهره ده احنا كده حانبقى ألاف ردت عليا بنت قالتلى لا واختى وزمايلها بالثانوى كمان قرروا انهم مش حايروحوا المدرسه وحاييجوا المظاهره .
خرجت من المطعم وانا لا اعرف ماذا افعل او ماذا سنفعل يوم 6 ابريل ماذا لو رايت 20 او 30 الف بميدان المنشيه ؟ ما هى مطالبنا بالتحديد ؟ تخفيض الاسعار ...... طيب لو الحكومه لم تستجيب لنا ماذا سنفعل ؟ هل نستمر بالاعتصام بميدان المنشيه وفى هذه الحاله لابد ان العدد سيتزايد وايضا لابد ان الامن سيتدخل لفض الاعتصام بالقوه وماذا لو نجحنا والعدد تزايد ؟ وماذا لو تدخل الامن كيف سنواجهه ؟ هل ستكون هناك مذبحه ؟ وهل من سيحضرون للتظاهر يعلمون انهم مقدمون على عمل كبير يمكن ان يغير مصر بأكملها ؟
ولكن السؤال الاهم الذى اخذ يراودنى ماذا لو نجحنا واسقطنا النظام فنحن لا يوجد لدينا البديل , البديل الوحيد للحزب الوطنى هم الاخوان المسلمين فهم الجماعه الوحيده المنظمه بمصر ولديهم القدره ان يستغلوا الفرصه ليستولوا على الحكم .
فهل نحن نعمل من اجل الاخوان المسلمين ام من اجل حقوقنا المشروعه , لم اشعر بالضعف الا فى هذا الوقت رغم انه كان المفروض ان اشعر بالقوه وقد استطعت ان احشد انا وزملائى الالاف بل قد يكونوا الملايين ولكن وجدتنى احشدهم لمصلحة جماعه الاخوان المسلمين وليس مصلحة مصر , اسرعت الى الانترنت وبدأت اكتب ارفض اشتراك الاخوان المسلمين فى الاضراب وأننا لن نرفع اى شعار حزبى ولن نسمح لاى اخوانى ان يرفع شعارات الاخوان , واعتقدت ان هذا هو الحل بالنسبه لمشكلة الاخوان المسلمين ولكن ما هو الحل بالنسبه لباقى المشاكل السابقه ماذا سنفعل ؟

جاء يوم الاربعاء واجتمعت مع منسق عام حركة كفايه وايضا سكرتير حزب الغد بالاسكندريه ووكيله ورئيس حزب الجبهه بالاسكندريه وبعض اعضاء حركة كفايه والاشتراكيون الثورييون , لم يأتى منسق حركة كفايه للتفاوض من اجل توحيد زمان ومكان التظاهر ولكنه اتى لفرض رأيه كان يتحدث عن مكان التظاهر بمحطه مصر وكأننا اتفقنا على الغاء المنشيه وعندما اعترضت قال لى انا قلتلك لما كلمتنى تعالوا انتم اعضاء الفيس بوك واشتركوا معانا طبعا كان ردى احنا كنا دعينا الناس للمنشيه وكل اسكندريه عارفه ان مكان التظاهر بالمنشيه وايضا انا عرضت على اعضاء الفيس بوك اننا ننقلها لمحطة مصر علشان ماخدش القرار لوحدى فرفضوا جميعا فكان رده مايرفضوا احنا ناس مسيسين الناس لازم تمشى ورانا مش احنا اللى نمشى وراهم رديت وقلت بس افرض الناس عايزه كده يبقى راى الناس لازم يمشى كان رده يتحرق الناس احنا اللى بنقرر مش هما , شعرت وقتها ان المعارضه مثلها مثل الوطنى لافرق بينهم , لماذا اعمل مع هؤلاء , يحاول بعضهم استغلال الناس لمصلحته الشخصيه والظهور امام الفضائيات ليتحدث بإسمهم وان تنشر صوره بالجرائد ( يتحرق الناس ) طيب بدل يتحرق الناس ايه اللى يخليك تنزل تتظاهر علشانهم ماتخليك فى شغلك ( بمناسبة موضوع الشغل وانا اتحدث مع منسق حركة كفايه عن ميعاد التظاهر قال لى الساعه 11 بدرى جدا احنا عندنا شغل نخليها الساعه 2 رديت عليه ازاى 2 وشغل ايه 6 ابريل فى اضراب كان رده ماهو يا احمد مش كل مصر حاتضرب عن العمل لسه بدرى على الكلام ده نخلص شغلنا وبعدين نروح المظاهره ) ازاى تكون انت اللى داعى للاضراب عن العمل وتروح انت شغلك لو مش كل مصر مش حاتضرب عن العمل اليوم ده لازم انت تضرب عن العمل ده انت اللى دعيت او كما تدعى ,انك انت اللى دعيت , حاولت ان اقنعهم يشاركوا بالمنشيه ويتركوا فكرة محطة مصر خاصة ان المكان غير مناسب تمام فعند سنترال محطه مصر وهو المكان الذى اختاروه يوجد اكبر اسواق الخضار بالاسكندريه ويوجد بائعين وازدحام شديد من النساء كما ان هذه المنطقه يتوافر بها عدد كبير من البلطجيه فالبتأكيد سيكون هناك احداث شغب .. ولكن لا حياه لمن تنادى صمموا على مظاهرة المحطه ولكنهم قرروا ان من يستطيع سيشارك بالمنشيه , قبل ان اخرج من الاجتماع اعلن حزب الغد انه سيشارك بجميع اعضائه بمظاهرة المنشيه وان رئيس الحزب بالاسكندريه سيكون ممثلا للغد فى مظاهرة محطة مصر , فقد كان الغد رايه متوازن كثيرا ويسعى لانجاح الحدثين وبعد ذلك ظهرت بعض الليونه فى الحديث فاتفقنا انه سيكون منسق عام حركة كفايه ورئيس حزب الجبهه بالاسكندريه سيتولوا التنسيق والتحدث مع الامن هذا اليوم